Ballina Aktualitet Basha kërcënon deputetët që do votojnë PPP-të: Sot po ju mbajmë shënim...

Basha kërcënon deputetët që do votojnë PPP-të: Sot po ju mbajmë shënim emrat, nesër do t’ju ndjekim këmba-këmbës

44

Pak orë para se deputetët në Kuvend të rrëzonin dekretet e presidentit Meta, përfshi edhe dy dekretet për koncesionet e rrugëve, Lulzim Basha ka bërë një kërcënim për deputetët.

Kryetari i PD tha se ata deputetë që do të rrëzojnë dekretin e Presidentit për të ligjëruar koncesionet e rrugëve do të ndëshkohen nga ligji, do të jenë pjesë e verifikimeve nga ligji antimafia por edhe SPAK.

“Dekreti i Presidentit të Republikës për kthimin e këtyre dy kontratave korruptive, po bëhet gati të hidhet poshtë nga parlamenti i dalë si pasojë e vjedhjes së votave. Vetëm një Parlament skllav i krimit dhe oligarkëve mund të votojë dy ligje të tilla.

Kjo është vjedhje me ligj. Ndaj dua të paralajmëroj sot çdo anëtar që ngre dorën për të votuar këtë ligj, se nesër do të jetë subjekt i ligjit Antimafia.

Sot po ju mbajmë shënim emrat, nesër do t’ju ndjekim këmba-këmbës. Çdo pronë dhe pasuri e juaj do të jetë në lutën e SPAK-ut”, tha Basha.

Basha tha se dy koncesionet ai Orikum-Dukat dhe Milot-Balldre janë kontrata korruptive të realizuara në restorantet e pëlqyera të kryeministrit pranë Kryeministrisë.