Ballina Aktualitet Berisha-Meta, plan për asgjësimin e Vetingut nëse vijnë në pushtet, Adriatik Llalla...

Berisha-Meta, plan për asgjësimin e Vetingut nëse vijnë në pushtet, Adriatik Llalla dhe Arjana Fullani shpresë për rikthi

16

Nëse Sali Berisha dhe Ilir Meta do të rikthehen në pushtet, përmes PD-LSI-së, në zgjedhjet e 25 prillit 2021, procesi i Vetingut, investimi më i madh dhe i rëndësishëm i Perëndimit në Shqipëri, do t’i ketë ditët e numëruara.

Nga kosa e Vetingut Berisha dhe Meta kanë humbur ushtarët e tyre më besnikë në drejtësi, të cilët i kanë përdorur për të mbyllur aferat dhe mbrojtur pasuritë e paligjshme.

Sali Berisha ka orkestruar një fushatë sulmesh të egra ndaj procesit të Ventingut, që po shemb perandorinë e korrupsionit dhe krimit në drejtësi, ndërsa Ilir Meta e ka konsideruar Vetingun një komplot ndërkombëtar, që kur humbi ‘delen’ e tij, Adriatik Llallën, i futur në listën e zezë të amerikanëve familjarisht dhe sot i pandehur në SPAK për kalim të parave të pista në kufi.

Meta dhe Berisha po mbështesin edhe një shoqatë, e quajtur shoqata e gjyqtarëve dhe prokurorëve të korruptuar, e cila po sulmon me padi penale anëtarët e dy shkallëve të Vetingut. Në këtë funksion, janë vënë edhe disa media që kontrollohen nga dyshja famëkeqe e pluralizmit shqiptar, Berisha-Meta.

Nga ana e tij, Ilir Meta, disa javë më parë, publikoi një plan me 11 pika, pas një takimi në Golem me Lulzim Bashën dhe Edi Ramën, gjatë karantinës së përgjithshme. Ky plan u përvëlua nga ambasadorja amerikane në Tiranë, Yuri Kim, e cila tha se “Shpresoj që fjalët për një marrëveshje prapa krahëve për të vrarë reformën në drejtësi në Shqipëri të mos jenë të vërteta. Reforma është e dhimbshme, e ngadaltë & jo perfekte por është e nevojshme, po bën përparim & duhet të vazhdojë”.

Megjithatë, Meta dhe Berisha janë të vendosur kundër Vetingut dhe reformës në drejtësi. Disa ditë më parë, ish-ministri i Drejtësisë së Ilir Metës, Ylli Manjani, i njohur ndryshe edhe si ministri i Balilit, bëri thirrje që të ndalohej Vetingu.

“Unë nuk mendoj se ka reformë, Shqipëria ka deformë. Çdo gjë është e deformuar. Ne kemi detyrë urgjente kombëtare të ndërtojmë shtetin.Të bëhen gjykatat urgjentisht, duhet ndaluar ky budallallëk i vettingut. Ky vetting duhet ndaluar, duhet bërë siç është në ligj. T’i japim një shans të dytë të njëjtës reformë. Kjo është një reformë personeli, që nuk ka ndryshuar asgjë”, tha Manjani.

Nisur nga kjo panoramë e qartë, nuk ka dyshime se Vetingu do të jetë në rrezik, nëse Berisha dhe Meta rikthehen në pushtet. Kjo është edhe shpresa më e madhe të disa ushtarëve të Metës dhe Berishës, të cilët kanë dhënë dorëheqjen nga drejtësia nga frika e Vetingut, por sot kundërshtojnë përjashtimin e tyre me 15 vite nga drejtësia, pasi synojnë të rikthehen në drejtësi.

Një ndër ta është edhe Arjana Fullani, bashkëshortja e ish-Guvernatorit të Bankës së Shqipërisë, Ardian Fullani, e cila ia mbathi nga drejtësia nga frika e përballjes me Vetingun për shkak të pasurive të dyshimta. Shkalla e parë e Vetingut vendosi që për Arjana Fullanin të ndërpritej hetimi për shkak të dorëheqjes, duke e përjashtuar me 15 vite nga drejtësia.

Fullani ka hapur një proces gjyqësor në shkallën e Vetingut ku kundërshton përjashtimin e saj nga drejtësia. Fullani synon ta heqë nga vendimi përjashtimin me qëllim për të pasur një shteg hapur për t’u rikthyer në drejtësi, nëse Berisha dhe Meta vijnë në pushtet dhe ndalojnë procesin e Vetingut.

Të njëjtin qëllim ka edhe Adriatik Llalla, në vendimin për të cilin çuditërisht nuk është shënuar përjashtimi nga drejtësia me 15 vite, ndryshe nga sa është vepruar në raste të tjera të ngjashme./Pamfleti