Ballina Aktualitet Detajet e vetingut: Në shumë vendime KPK jo korrekte! ONM dhe Komisioneri...

Detajet e vetingut: Në shumë vendime KPK jo korrekte! ONM dhe Komisioneri Publik në 40 raste dolën kundër, asnjë prej të

18

Proces i vetingut për gjyqtarët dhe prokurorët ka marrë vëmendjen e të gjithë qytetarëve shqiptarë dhe jo vetëm, të cilët kanë ngjallur shpresat për një drejtësi të pavarur dhe të drejtë për të gjithë.

Nga fillimi i procesit të vetingut në muajin shkurt 2018 e deri në fund të muajit korrik, Komisioni i Pavarur i Kualifikimit ka zhvilluar mbi 250 seanca dëgjimore me njerëzit e drejtësisë. Por jo të gjitha vendimet që janë dhënë nga shkalla e parë e vetingut janë pranuar nga faktori ndërkombëtar.

Kështu, Komisioneri Publik ka dalë kundër vendimit të KPK në plot 40 raste në total, 12 nga të cilat kanë qenë me rekomandim të Operacionit Ndërkombëtar të Monitorimit. Kjo e fundit, ka kundërshtuar vendimin e shkallës së parë të vetingut për ish-kreun e Gjykatës së Lartë, Xhezair Zaganjori pas konfirmimit në detyrë dhe i ka rekomanduar Komisionerit Publik ta apelojë në Kolegjin e Posaçëm të Apelimit për të kërkuar shkarkimin nga detyra pas problemeve të konstatuara me pasurinë. Por të njëjtin rekomandim, ONM e bëri edhe për ish-kreun e Gjykatës Kushtetuese, Bashkim Dedja, pas problemeve të hasura në kriterin e pasurisë.

Po ashtu, ONM i kërkoi Komisionerit Publik të apelojë vendimin e Komisionit të Pavarur të Kualifikimit për konfirmimin në detyrë të gjykatësit Artur Malaj. Për këtë të fundit, vëzhguesja e ONM pati shprehur dyshimet për pasuritë e gjykatësit dhe të afërmve të tij gjatë seancës dëgjimore, por KPK në vendimin e saj më 3 gusht vlerësoi se ato nuk ishin të mjaftueshme për të shkarkuar anëtarin e Gjykatës Administrative të Apelit në Tiranë dhe e konfirmoi atë.

Por ONM, e cila më herët po ashtu ka kërkuar apelim për Gentian Medjan dhe prokurorin Genti Osmani, i kërkoi Komisionerit të apelojë rastin në Kolegjin e Posaçëm të Apelimit. Por Komisioneri Publik ka bërë me dije në faqen zyrtare se ONM ka kundërshtuar KPK edhe për Besnik Canin, Adnan Kosovën, Kastriot Selitën, Besim Hajdarmatajn dhe Anita Jellan.

Ja kundërshtimet e Komisionerit Publik

Por nga 40 raste në total të kundërshtimit të vendimit të KPK, 28 prej tyre janë ankimuar në Kolegjin e Posaçëm të Apelimit nga Komisioneri Publik. Ky i fundit doli kundër Komisionit për konfirmimin në detyrë të ish-kryeprokurorit Adriatik Llalla, ku pas ankimimit, ishte Kolegji ai i cili e shkarkoi nga detyra dhe e nxori nga sistemi i drejtësisë për 15 vjet pas problemeve në të treja kriteret.

Të njëjtin fat pati edhe ish-kryeprokurorja e Krimeve të Rënda, Donika Prela, Regleta Panajtoi, Petrit Çano apo edhe Besnik Muçi, Arben Dollapaj dhe Alma Kolgjoka. Po ashtu, Komisioneri Publik ka ankimuar vendimin edhe për Anton Martini, Irena Gjoka, Ludovnik Dodaj, Miranda Andoni dhe Etleva Deda.

Beteja në Apel

Por vendimet e KPK nuk janë pëlqyer as nga një pjesë e njerëzve të drejtësisë. Shumë gjyqtarë dhe prokurorë të cilët janë shkarkuar nga KPK e kanë ankimuar vendimin në Apel. Por në asnjë rast ata nuk e kanë fituar betejën, por ka mbetur në fuqi vendimi i dhënë nga shkalla e parë e vetingut duke i nxjerrë ata përfundimisht për 15 vjet nga sistemi i drejtësisë. Pra në rastet kur Komisioni i Pavarur i Kualifikimit ka dhënë vendimin për shkarkim nga detyra, nga ana e Kolegjit të Posaçëm të Apelimit janë konsideruar si të vlefshme dhe janë lënë në fuqi.