Ballina Aktualitet Dridhet politika! Pas zbulimit të llogarive bankare në 81 shtete ngrihen 7...

Dridhet politika! Pas zbulimit të llogarive bankare në 81 shtete ngrihen 7 grupe pune mr 21 prokurorë

20

Intensifikohen lëvizjet e autoriteteve për të goditur pastrimin e parave dhe krimin ekonomik. Teksa pak kohë më parë u arrit një marrëveshje për të zbuluar llogaritë bankare në 81 shtete, Prokuroria e Përgjithshme ka ngritur 7 strukturat e posaçme në luftën kundër pastrimit të parave, hetimet pasurore apo çdo krim tjetër financiar.

Përmes një njoftimi të shpërndarë për mediat, prokuroria bën me dije se këto struktura kanë nisur punën në 7 prokuroritë pranë gjykatave të rretheve gjyqësore Tiranë, Durrës, Shkodër, Elbasan, Fier, Vlorë dhe Korçë. “Tiranë, 14 shtator 2020.

Në kuadër të Memorandumit të Bashkëpunimit nr. 1079, datë 15.07.2020 mes Prokurorit të Përgjithshëm, Ministrit të Financave dhe Ekonomisë dhe Ministrit të Brendshëm “Për rritjen e efektivitetit në hetimet që lidhen me pastrimin e parave, financimin e terrorizmit, krimet financiare dhe sekuestrimin e konfiskimin e aseteve kriminale, në funksion të përmbushjes së rekomandimeve të KSA -së e FATF dhe Planit të Veprimit ICRG/FATF” dhe në zbatim të Udhëzimit të Përgjithshëm nr.10 datë 17.07.2020 të Prokurorit të Përgjithshëm,

“Për masat administrative dhe procedural për rritjen e efektivitetit në luftën kundër pastrimit të parave, krimeve financiare, financimit të terrorizmit dhe në hetimet pasurore në prokuroritë e juridiksionit të përgjithshëm” gjatë muajit shtator u krijuan dhe nisën punën seksionet e posaçme në 7 prokuroritë pranë gjykatave të rretheve gjyqësore Tiranë, Durrës, Shkodër, Elbasan, Fier, Vlorë dhe Korçë”, thuhet në njoftimin e prokurorisë. Por me këto lëvizje duket se politikës në vend i janë futur të dridhurat.

Tashmë dihet që politikanët janë ata të cilët kanë fshehur pasuritë e tyre jashtë vendit, por me marrëveshjet e arritura, duket se nuk do e kenë më të lehtë për t’ia hedhur. Kështu, ata që janë më të tmerruar është pikërisht klasa politike në vend.

Ja sa prokurorë janë të angazhuar

Por për hetimin e një sërë krimesh në fushën e tatimeve, doganave apo edhe atë të pastrimit të parave dhe konfiskimit të aseteve kriminale, Prokuroria e Përgjithshme ka angazhuar 23 prokurorë. Përmes ngritjes së këtyre grupeve të punës do të synohet goditja e parave të vënë në mënyrë të jashtëligjshme.

Por këto grupe pune do të kenë edhe një asistencë të shtuar nga institucionet e tjera vendase, ku do të koordinohen me Policinë e Shtetit, Drejtorinë e Tatimeve, atë të Doganave dhe Drejtorinë e Pastrimit të Parave. “Janë 23 prokurorë, pjesë e seksioneve të posaçme, që do të angazhohen posaçërisht në hetimet që lidhen me krimet në fushën e tatimeve, doganave, pastrimin e produkteve të veprës penale, financimin e terrorizmit, dhe sekuestrimin e konfiskimin e aseteve kriminale.

Përmes krijimit të këtyre strukturave, synohet rritja e efikasitetit në hetimin dhe gjykimin e këtyre veprave penale si dhe goditja e pasurive të vëna në mënyrë të paligjshme.

Strukturat e krijuara do të mbështeten nga njësi të specializuara në Drejtorinë e Përgjithshme të Policisë së Shtetit, Drejtorinë e Tatimeve, Drejtorinë e Doganave si dhe nga Drejtoria e Parandalimit të Pastrimit të Parave.

Puna e tyre do të mbështetet në nivel qendror nga koordinimi mes Prokurorisë së Përgjithshme, Ministrisë Brendshme dhe Ministrisë së Financave, të cilat do të garantojnë sigurimin e mbështetjes së nevojshme për mirëfunksionimin e tyre”, thuhet në njoftimin e prokurorisë.

Gjithashtu do të ketë një bashkëpunim për punën e tyre mes Prokurorisë së Përgjithshme, Ministrisë së Brendshme dhe Ministrisë së Financave. Përmes krijimit të këtyre strukturave, synohet goditja e pasurive të vëna në mënyrë të paligjshme.