Ballina Aktualitet Edi Rama i prerë: Ilir Meta nuk shpëton dot nga shkarkimi, zgjedhjet...

Edi Rama i prerë: Ilir Meta nuk shpëton dot nga shkarkimi, zgjedhjet e reja do të mbahen në vitin 2021

32

Kryeministri i vendit Edi Rama ka paralajmëruar dje presidentin Ilir Meta se nuk do i shpëtojë shkarkimit. Gjatë një interviste, teksa ka komentuar aktualitetin politik, i pari i qeverisë u ndal gjatë tek presidenti Ilir Meta. Ai e bëri të qartë se mazhoranca do i shkojë deri në fund shkarkimit. I pyetur nga gazetarja nëse ky proces është një presion apo jo, Rama tha se shumica qeverisëse nuk është krijuar që të merret me presione. “Kjo shumicë qeverisëse nuk është krijuar që të bëj presione ndaj askujt.

Procesi i shkarkimit të Metës është një proces që tashmë është në duart e Parlamentit dhe i takon atij ta çojë deri në fund pa diskutim”, tha ai. I pyetur nga gazetarja në lidhje me deklaratat e Metës, Rama u shpreh se nuk do të flasë asnjëherë për to, pasi qëllimi i tij dhe i partisë së tij, është të merret me problemet e njerëzve dhe jo me fjalët e kota të presidenti, siç i ka cilësuar vetë Rama. “Do të dëgjoni gjithmonë e më pak nga unë komente për të tjerët, për këdo qoftë. Unë dua që të jem gjithnjë e më shumë i fokusuar tek problemet e njerëzve tek çështjet e vendit, tek sfidat e përbashkëta, duke u përpjekur për të bërë çmos që të kontribuoj në një fazë të lodhshme, tejet acaruese për njerëzit. Kështu që seç ka thënë njëri apo se çka thënë tjetri, secili thotë atë që do. Mua personalisht më takon që ta luftoj deri në fund me shembullin tim, duke u përpjekur që të shmang sa më shumë të jetë e mundur, më the të thash, ku zhvillohet politika e ditës”, u shpreh Rama. Ndërsa në lidhje me deklaratën e Metës, se Rama ka ngritur një shtet të propagandës dhe Meta po lufton për një shtet të së drejtës, Rama vendosi ta injoronte sërish. “Unë këto nuk i shikoj fare, unë i shikoj se si të bëj më shumë për njerëzit, nuk shikoj çfarë thonë të tjerët”, vijoi Rama.

Zgjedhjet në 2021

Gjatë intervistës ai ka komentuar edhe mundësinë e një dialogu mes PS dhe opozitës jashtë parlamentare, ku prioriteti i dialogut do të ishte reforma zgjedhore. Rama nuk e ka hedhur poshtë mundësinë e dialogut dhe është shprehur i gatshëm për t’u ulur në dialog me opozitën, ama gjatë fjalës së tij ai ka theksuar se nuk e sheh problemin tek sistemi zgjedhor, ku ka shtuar se me anë të këtij sistemi, sipas tij është arritur shumë. Në lidhje me zgjedhjet e parakohshme, ai ka folur mjaft qartë, ku ka theksuar se janë duke u bërë gati për zgjedhjet e 2021.“Zgjedhje të parakohshme janë një tagër, i atyre që kanë shumicën, dhe askush tjetër nuk mund t’i vendos dhe aq më pak t’i imponojë. Ne kemi një kontratë me shqiptarët, e cila përfundon në 2021, dhe ndërkohë koha vrapon, dhe është koha për të përgatitur zgjedhjet e 2021. Sepse realisht, midis reformës zgjedhore dhe gjithë përgatitjeve që partitë pastaj bëjnë për zgjedhje, nuk është se është një kohë e pafundme. Çdo muaj që kalon, e bën atë më të shkurtër, dhe mendoj se nëse do të arrinim një reformë zgjedhore të suksesshme, deri në fund të këtij sezoni”,tha Rama.

Dialog PS-PD

Zërave se mund të ketë një pakt PS-PD, kryeministri Edi Rama i është përgjigjur ditën e djeshme ku ka thënë se është i hapur për dialog. Apeleve nga ndërkombëtarët për tu ulur në dialog, mesa duket Rama i ka mirëpritur, pasi dje u shpreh se për të çuar para reformën zgjedhore do të ulej të negocionte me opozitën jashtëparlamentare. Ama për Ramën problemi nuk qëndronte aspak tek sistemi zgjedhor. “Opozitën nuk e zgjedhim ne, opozita është ajo që të tjerët kanë zgjedhur. Për sa më takon, përgjegjësia ime është që të bëjë maksimumin, dhe shumica qeverisëse është që të bëjë maksimumin, që të krijojë një atmosferë sa më pozitive për të çuar përpara punët e vendit. Do ta bëjmë këtë me përpjekje të mëdha edhe për të mundësuar opozita, të gjitha opozitat, se kemi disa, të ndjehen mirë në punët e tyre në raport me ne”, u shpreh Rama. /Arbjona ÇIBUKU/ Sot