Ballina Aktualitet Krerët e bashkive valë kritikash ministrave në takimin me Ramën: Shefi i...

Krerët e bashkive valë kritikash ministrave në takimin me Ramën: Shefi i qeverisë kërkon 800 mijë vota, punësimet në do

21

Ashtu siç gazeta e paralajmëroi një ditë më parë, kryeministri Edi Rama mblodhi dje në Elbasan kryebashkiakët socialistë. Në 1 shtator zoti Rama zhvilloi po në Elbasan një takim me deputetët e grupit parlamentar socialist, të cilëve iu ndau porositë për fushatën e zgjedhjeve të ardhshme.

Ndërkohë që gazeta ka mësuar se edhe në takimin e djeshëm fokus i mbledhjes që ka zgjatur mbi 2 orë e 30 minuta me 60 drejtuesit vendorë të Partisë Socialiste ka qenë pikërisht fushata dhe zgjedhjet parlamentare të vitit 2021. Por burime nga ky takim theksuan se mbledhja është shoqëruar me momente të nxehta, pasi disa krerë bashkish kanë shfaqur kritika publike ndaj ministrave të qeverisë “Rama”, duke i akuzuar këta të fundit për mbivendosje kompetencash dhe futjen e “hundëve” në punët apo çështje që janë ekskluzivitet i tyre.

Po ashtu, disa prej këtyre kryebashkiakëve kanë kritikuar para Ramës punën e disa prej ministrave, pasi sikundër e theksoi burimi, me vendimet e tyre arrogante ata iu hodhën në “erë” sezonin turistik. Ndërkaq, mësohet se kryebashkiakët kanë akuzuar ministrat se janë kthyer në arrogantë, duke vënë në dijeni zotin Rama se në shumë raste ata nuk iu hapin telefonin.

Nga ana tjetër, mësohet se kryebashkiakët e PS kanë akuzuar ministrat se në disa raste kanë shkelur autonominë e bashkive. Por këto kritika të adresuara ndaj ministrave, duket se do të jenë një arsye më shumë që shefi i qeverisë të bëjë ndryshime në qeveri, duke qenë se pakënaqësia ndaj vartësve të vet është shtuar. Kujtojmë që pak kohë më parë ka qenë kryebashkiaku i Lezhës, Pjerin Ndreu, i cili u përplas live me ministrin e Brendshëm, Sandër Lleshaj, ndërsa e akuzoi këtë të fundit se po prishte ndërtimet pa lejë në mes të sezonit turistik pa e lajmëruar atë.

Rama kërkon 800 mijë vota

Por pasi i ka dëgjuar kritikat në adresë të ministrave të kabinetet qeveritar, sipas informacioneve nga mbledhja, mësohet se kryeministri Edi Rama ka kërkuar nga 57 kryebashkiakët socialistë që të zbresin në bazë dhe të nisin kontaktet me qytetarët për zgjedhjet e ardhshme parlamentare të vitit 2021.

Dhe kur dihet që për këtë zgjedhje mazhoranca e Partisë Socialiste ka shprehur ambicien për t’i fituar, mësohet se kryeministri Rama ka kërkuar prej të zgjedhurve vendorë që të mos të neglizhojnë punët e përditshme në komunitet, por nga ana tjetër të shtojnë përpjekjet për të arritur objektivin e 800.000 votave. Po ashtu, mësohet se kryeministri ka kërkuar që të punohet fort me të zhgënjyerit dhe ata pa parti, duke iu barë të qartë krerëve të bashkive që t’i ftojnë në PS.

Sakaq, mësohet se shefi i ekzekutivit ka kërkuar nga kryebashkiakët evidentimin e të gjithë punës së rindërtimit. Por Rama ka lënë edhe një porosi të veçantë për 57 drejtuesit vendorë të Partisë Socialiste. Nga sot e tutje sikundër pohoi burimi i gazetës nga mbledhja, emërimet e drejtorëve duhet t’i çohen për konsultim zv/kryeministrit Erjon Brace. Pra, referuar këtij udhëzimi-porosi kryebashkiakët nuk do të mund të propozojnë më drejtorët rajonalë me kokën e tyre, pasi para se të ndodhë kjo gjë, ata duhet të marrin bekimin e zotit Braçe.

Nga ana tjetër, sipas të njëjtave burime Rama ka kërkuar që të vijohet me punësimet, madje ai i ka porositur kryebashkiakët të jenë në kontakte të vazhdueshme me Zyrat e Punës, pasi këto të fundit janë vitrina të shumë vendeve të lira të punës që ofron shteti dhe sidomos privati. Ndërkohë, pas takimit me kryebashkiakët, Rama takoi dje në mbrëmje deputetët e qarkut të PS në selinë rozë, ku ju ndau porositë për zgjedhjet e ardhshme.