Ballina Aktualitet Ngritja e SPAK trondit PD-LSI: Ja 7 ish-ministrat që rrezikojnë t’u rihapen...

Ngritja e SPAK trondit PD-LSI: Ja 7 ish-ministrat që rrezikojnë t’u rihapen dosjet që u mbylli Llalla, nga Basha te Imami e

31

Ngritja e Prokurorisë së Posaçme Antikorrupsion duket se po lë pa gjumë shumë emra në politikën shqiptare. KLP dhe ndërkombëtarët kanë premtuar se brenda vitit ajo do nisë të funksionojë normalisht dhe fokusi do jetë te dosjet e bujshme të korrupsionit. Gazeta ka treguar më parë se kush janë të parët që rrezikojnë, duke filluar nga Llalla e Tahiri, pasi janë nën hetim. Por pas dosjeve që janë të hapura, do të vijë radha dhe e dosjeve që kanë zënë pluhur në sirtarët e prokurorisë.

Gjatë kohës që në krye të organit të akuzës ishte Adriatik Llalla, i vetmi pushtetar që u dërgua në gjykatë ishte Spiro Ksera, por për të gjetjet u bënë nga Kontrolli i Lartë i Shtetit. Ndërsa, shumë emra të tjerë as që e panë derën e prokurorisë, pasi hetimet u pushuan në heshtje për mjaft emra ta njohur. Por sipas ligjit, këto dosje mund të rihapen. Kur të ngrihet SPAK, të gjithë dosjet që janë te Krimet e Rënda, te Prokuroria e Përgjithshme dhe prokuroritë tjera, si ato nën hetim dhe ato të pushuara, do kalojnë te SPAK. Por kur të ndodhë kjo, janë 7 ish-ministra të PD dhe LSI që rrezikojnë të rihetohen. Ndër të parët që rrezikon të jetë në hetim është pikërisht Lulzim Basha, pasi ndaj tij ka një sërë akuzash. Së pari është rruga Durrës-Kukës, ku Basha i shpëtoi hetimit. Një tjetër akuzë e ngritur ndaj tij është 21 Janari, pasi Ministria e Brendshme ka bërë një padi, por që Adriatik Llalla e mbylli. Po ashtu ka dhe dy kallëzime të tjera për abuzime me lejet e ndërtimit si kryetar Bashkie i Tiranës. Pra, janë 4 akuza ndaj Lulzim Bashës. Emra të tjerë janë Ridvan Bode dhe Sherefedin Shehu. Të dy të kallëzuar për skandalin me rrugën Durrës-Kukës, pasi morën kredi me interes shumë më të lartë se normalja. Po ashtu i rrezikuar është Genc Ruli. Në 2012 pati një hetim ndaj tij për koncesionin në minierat e kromit, por u pushuan hetimet. Po ashtu ai dhe Florion Mima u paditën nga qeveria aktuale në 2015 për privatizimin e OSSH, ku u pushuan sërish hetimet. Një tjetër emër është Arben Imami. Ndaj tij ka pasur 4 padi për abuzime si ministër i Mbrojtjes dhe në asnjë rast nuk u dërgua çështja në Gjykatë. Një tjetër emër vjen nga LSI. Bëhet fjalë për Edmond Haxhinaston. Në prokurori ka një dosje ndaj tij për privatizimin e “Albpetrol”. Gjatë kohës së qeverisë “Berisha”, Haxhinasto ishte ministër i Energjisë dhe personi kyç që firmosi privatizimin. Mirëpo pasi u arrit marrëveshja, kompania u largua, pa lënë si garanci 85 milionë euro, siç parashikohej në kontratë.

Adriatik Llalla është sot nën hetim falë amerikanëve. Ata e shpallën “non grata” dhe prokuroria nisi hetimet ndaj tij, duke ngritur 4 akuza penale. Ndërkohë, SPAK po bëhet po me ndihmën e amerikanëve. Pra, nëse bëjmë lidhjen, amerikanët e fundosën Llallën pasi ai flinte mbi dosje. Tani situata ka ndryshuar dhe ato dosje që groposi ish-kryeprokurori do shohin dritën e hapjes. Ligji shqiptar lejon që një dosje të rihapet, nëse nuk është gjykuar. E vetmja gjë që ndalohet është që të rihapet dosja për një person të dënuar, me qëllim rritjen e dënimit. Ndërkohë, në këtë rast çështjet thjesht janë pushur dhe kushdo prokuror që ka vullnet, mund të rinisë hetimet.
Përveç 7 ish-ministrave të PD-LSI, ka dhe shumë emra të tjerë që janë hetuar për shumë muaj, por që ja hodhën paq. E para është ish-kryetarja e KQZ, Lefterie Luzi, e cila u padit nga KLSH për shkelje me tenderat. Kemi 7 kryetarë apo ish-kryetarë bashkie të paditur nga KLSH, duke filluar nga kryetarja e Bashkisë Patos, kreu i Bashkisë Belsh, ish-krye i Bashkisë Rrogozhinë, ish-kreu i Bashkisë Himarë, ish-kreu i Bashkisë Kukës, ish-kryetarja e Bashkisë Sarandë, etj. Gazeta e ka denoncuar disa herë se prokuroria nuk merrte për bazë kallëzimet e KLSH, por me SPAK situata do ndryshojë. Abuzimet me tenderat janë kompetencë e saj dhe prite të ketë zhvillime të bujshme. /Kliti Topalli