Ballina Aktualitet Përse nuk shfaqet prej 16 ditësh kryeministri Edi Rama?

Përse nuk shfaqet prej 16 ditësh kryeministri Edi Rama?

45

Prej 16 ditësh kryeministri Edi Rama mungon plotësisht në komunikimin me publikun.

Shfaqjen e fundit në publik, ai e pati më 10 gusht teksa vizitoi rrugën në ndërtim, Delvinë-Kardhiq. Më herët ai kishte shkuar për disa ditë pushime familjare në vilën qeveritare në Dhërmi, të cila i mbylli më 10 gusht.

Pas asaj dite, z.Rama nuk ka dalë më në asnjë media përfshirë në rrjetet e tij sociale dhe ERTV.

Në vend të tij, në to publikohen postime të vazhdueshme, por në asnjë prej tyre nuk gjendet Edi Rama.

Edhe mbledhjet e qeverisë që vitet e kaluara mungonin vetëm një ose dy javë gjatë verës, nuk zhvillohen më prej 29 korrikut.

Që nga 10 gushti, ka patur 2 a 3 mesazhe të shkruara në Twitter, njëra prej tyre, në lidhje me krizën politike në Bjellorusi.

Bashkimi Europian i kërkoi Ramës të jetë negociator për bisedimet mes qeverisë dhe opozitës në Bjellorusi, meqenëse si ministër i Jashtëm i dekretuar, ai është njëherësh edhe kryetar i radhës së Presidencës së OSBE për vitin 2020.

BE madje ofroi organizimin e këtyre negociatave që u tha se do të zhvilloheshin në Minsk, raporton noa.al.

Por kjo axhendë e z.Rama duket të ketë ngelur në rrugë qorre, përderisa Rama nuk po shfaqet gjëkundi prej kaq ditësh, diçka fort e rrallë për të, madje është hera e parë në shtatë vjet kryeministër, që ai mungon kaq gjatë në komunikimin publik.

Në këto kohë pandemie, janë shtuar zërat se infektimi me COVID-19 mund të mos ketë kursyer as z.Rama, por një gjë e tillë mbetet vetëm dyshim, sa kohë prej tij dhe zyrës së shtypit ka vetëm heshtje prej 16 ditësh. /noa.al/

Në foto: Rama në daljen e fundit deri sot, më 10 gusht