Prag-ndeshja me Lituaninë / Reja dhe Hysaj në konferencë: Problem dëmtimet fizike! – Descript

23

Shqipëria zhvillon nesër në mbrëmje (20:45) ndeshjen e dytë në Nations League.

Në “Air Albania” zbarkon Lituania dhe kuqezinjtë e Edi Rejës do të tentojnë fitoren e dytë pas asaj 0-2 në Minsk përballë Bjellorusisë.

Kapiteni i kombëtares, Elseid Hysaj ka dalë në konferencën për shtypin përkrah trajnerit italian, Edy Reja.

Trajneri Edy Reja:

Në fjalën e tij, strategu italian u shpreh:

“Është një ndeshje e ndryshme, e vështirë. Lituani luan mirë me topin, është e shpejtë nga krahët. Kam besim te ekipi im. Do më duhet të bëj disa ndryshime. Do jem shumë i kujdesshëm në zgjedhjet e mia. Ata humbën, por skuadra reagon dhe mund të na hapë shumë punë.

Sa i përket fazës sulmuese kam probleme, pasi Cikalleshi ka shqetësime fizike. Për mbrojtjen nuk është se kam ndonjë shqetësim, pasi nuk lodhen shumë, sidomos tre mbrojtësit e qendrës. Kam edhe Enea Mihaj, i cili është kandidat për të luajtur.

Edhe për pjesën e mesfushës, kemi Baren dhe Abrashin, që kanë shpenzuar shumë energji. Po shikoj dhe në mesfushë për të bërë ndonjë ndryshim. Nuk e di si do të jetë Hysaj, nëse do të jetë “top” si kundër Bjellorusisë, por duhet të tregojmë shumë kujdes për lojtarët, që të mos pësojnë dëmtime.

Sigurisht që jam i kënaqur me rezultatin ndaj Bjellorusisë, por rruga është e gjatë. Nuk mund të them se kemi eufori, pasi kemi nisur menjëherë të përgatisim ndeshjen e radhës. Nuk duhet të bëjmë asnjë gabim. Nuk isha i kënaqur me sulmin kundër Bjellorusisë, pasi nuk e ndihmoi shumë skuadrën, por për shkak të problemeve fizike, edhe ndeshja nuk u interpretua nga lojtarët siç duhet.

Ne kishim 9 muaj pa u takuar me njëri-tjetrin dhe për tre ditë, është shumë e vështirë. Ishte e vështirë të fitonim, por jam shumë i kënaqur me lojtarët e mi. Treguan se donin të fitonin me çdo kusht. Ne kompensuan pjesën fizike me karakterin që treguam në fushë.

Roshi? Ai hyn në fushë dhe zgjidh ndeshjen. Unë do të doja që Roshi të ishte titullar, por për shkak të modulit me të cilit luajmë, nuk është e mundur. Ua kam thënë lojtarëve, sikur 5 minuta të luajnë, duhet të japin maksimumin në fushë. Është e vështirë të ndryshohet skema gjatë rrugës. Unë kam kohë që luaj me këtë skemë dhe ekipi është përshtatur. E kam provuar dhe Roshin, por nuk dua të bëj eksperimente të tilla.

Ramadani dhe Ismajli? Për sa i përket dy lojtarëve, kanë disa probleme fizike dhe më vjen shumë keq. Mund të them se nuk mund të rikuperohen për këto dy ndeshje. Duhet të presim tetorin. Më vjen keq, sepse i kisha në planet e mia. Normalisht, mua më duhen 22 lojtarë për dy ndeshje. Por sigurisht që ne kemi shumë alternativa, kemi shumë lojtarë të rinj: Çekiçi, Laçin. I kam parë në stërvitje, janë shumë mirë teknikisht dhe fizikisht.

Janë dhe Broja e Çepele, që kanë bërë shumë mirë. Më ka pëlqyer shumë Broja, por dhe Çepele, i cili është vetëm 17-vjeç, por është një lojtar që duket sikur ka shumë eksperiencë. Sigurisht do të vijë edhe momenti për këto lojtarë të rinj.

A do ketë debutues? Kemi lojtarë që mund të debutojnë nga fillimi, por dhe nga stoli. Për të vendosur, do të mendohem mirë, deri sa të dal në një konkluzion”, u shpreh Reja.

Elseid Hysaj:

Shkodrani analizon sfidën ndaj lituanezëve, tregon objektivin e skuadrës, flet për skemën 3-5-2, teksa nuk mungon një koment për Napolin.

Është pak e vështirë në aspektin fizik, pasi kemi pak ndeshje që kemi luajtur. Po mundohemi të rikuperohemi dhe të jemi në 100% për këtë ndeshje. Kemi parë ca video të Lituanisë, kemi parë që janë një ekip që i pëlqen të luajë topin. Duhet të kemi kujdes në mbrojtje. Ata me sulmuesit që ngrihen shumë, do të na lënë hapësira për të sulmuar.

Skema 3-5-2 e Rejës nuk më përshtatet? Është një rol i ri për mua, jam mësuar të luaj me 4 në mbrojtje, por po më pëlqen. Më jep mundësinë të shkoj më para dhe t’i ofrohem golit. Po mundohem të sistemoj ca gjëra që më ka kërkuar trajneri, jam i kënaqur me rolin e ri. 

Napoli? Karriera ime është në lulëzim. Jam 26 vjeç, nuk kam asnjë problem me Napolin. Kam pritur gjëra e mia, Napoli është bërë si shtëpia ime e dytë, shpresoj të rinovoj dhe të qëndroj edhe për shumë kohë. Unë kam shumë qejf që të shënoj. Ka filluar të më pëlqejë goli, ky modul më jep mundësinë të jem edhe më afër portës. Shpresoj që nesër të shënoj ndaj Lituanisë“, tha Hysaj.

The post Prag-ndeshja me Lituaninë / Reja dhe Hysaj në konferencë: Problem dëmtimet fizike! appeared first on Descript.