Ballina Aktualitet Thellohen përplasjet: PS paralajmëron shkarkimin e Ilir Metës dhe nxjerrjen e tij...

Thellohen përplasjet: PS paralajmëron shkarkimin e Ilir Metës dhe nxjerrjen e tij shumë shpejt në opozitë! Likja sulmon dr

37

Përplasjet mes mazhorancës dhe Presidencës janë thelluar ditën e djeshme. Ministrja e Shtetit për Marrëdhëniet me Parlamentin, Elisa Spiropali gjatë fjalës së saj ditën e djeshme në Kuvend, ka dhënë alarmin për presidentin Meta. Ajo ka cilësuar Komisionin Hetimor Parlamentar, që u ngrit për shkarkimin e presidentit Meta, si një mekanizëm çlirues, për ta kthyer Metën në krye të opozitës.

“Ashtu siç bëri edhe kur zhdekretoi zgjedhjet, duke paralajmëruar qametin që nuk ndodhi, ende presim me kërshëri të dimë se kush donte ta digjte Parlamentin. Dështuan në mënyrë spektakolare jo vetëm në zgjedhje, do vazhdojnë të dështojnë, përderisa nuk kanë asnjë vizion shtet-bërës. Kujtoj se Komisioni Hetimor nuk do shërbejë si mekanizëm ndëshkues, por si një mekanizëm çlirues për ta kthyer Ilir Metën në krye të opozitës”, ka deklaruar dje Spiropali. Ndërkohë edhe kreu i grupit parlamentar të PS, Taulant Balla ka reaguar ditën e djeshme duke sulmuar presidentin Meta. Balla është ndalur te kandidaturat që ka propozuar presidenti Meta, të cilat sipas Ballës janë të papërshtatshme për postin. Balla i ka kërkuar Kuvendit që të dalë me një strategji për të zgjidhur situatën. Reagon Presidenca Presidenca ka reaguar ndaj ministres së Shtetit për Marrëdhëniet me Parlamentin, Elisa Spiropali, e cila sulmoi presidentin Ilir Meta nga foltorja e Kuvendit. Zëdhënësi i presidentit, Tedi Blushi i drejtohet Spiropalit, duke i thënë që të lexojë raportin final të OSBE/ODIHR për dekretin kushtetues të Presidentit.

“E ftojmë të Çmendurën E, të lexojë raportin final të OSBE/ODIHR për dekretin kushtetues të Presidentit Meta dhe sjelljet antikushtetuese të Kuvendit, KQZ dhe Kolegjit Zgjedhor, që i provojnë të gjithë botës demokratike kapjen e shtetit nga Rilindja moniste. Klithmat anti-presidenciale të porositura sot me urgjencë duan të s’postojnë vëmendjen nga miratimi kokëfortë i PPP-ve më të shtrenjta në botë, në kundërshtim me Kushtetutën, ligjin dhe interesin publik, dhe në kurriz të qytetarëve shqiptarë”, ka shkruar Blushi. Ditën e djeshme mazhoranca vendosi që të rrëzonte tetë dekretet e Metës, e kjo duket se e ka prekur Metën pasi ka reaguar pas këtij vendimi. Presidenti Meta ka publikuar dje një foto në Facebook, me kryeministrin e vendit Edi Rama. Me anë të kësaj fotoje Meta ka dashur të ironizojë mazhorancën dhe veçanërisht Ramën, pasi shkruan se do që t’i japë atij “Urdhrin e Skënderbeut”, por ai kërkon “Urdhrin e Tao-Spiropalit”, duke lënë të kuptohet që e ka fjalën për Taulant Ballën dhe Elisa Spiropalin. Ndërkohë që Rama ndodhej në Pragë, ku po merrte pjesë në një samit të rëndësishëm, ai ka shpërndarë në Facebook një për një fjalën e ministrave të tij dhe të kreut të grupit parlamentar të PS, Taulant Balla, të cilët njoftuan rrëzimin e dekreteve të Metës, si dhe kandidaturën e tij të tretë për kreun e Kontrollit të Lartë të Shtetit, Petraq Milon.

Kjo mesa duket e ka “acaruar” Metën, i cili dy ditë më parë, gjatë deklaratës për shtyp, ironizoi sërish Ramën. “Unë i jap dekoratë Edit më datë 18 tetor vetëm ai të marrë datën e çeljes së negociatave të Shqipërisë. Siç iu dha ai dekorata ambasadorëve që çelën negociatat vjet e parvjet, unë do t’ia jap dekoratën, ai le të mos e pranojë. Bile do t’i jap Urdhrin e Skënderbeut. Absolutisht”, tha Meta gjatë deklaratës për shtyp./Arbjona ÇIBUKU/Sot