Ballina Sport Tirana – Crvena Zvezda, gjykon Sjoberg, serbët duan ‘1945’

Tirana – Crvena Zvezda, gjykon Sjoberg, serbët duan ‘1945’

27

Në Serbi e quajnë sensacionale, jo aq për kundërshtarin e fortë sesa për flamurin që përfaqëson, ndërsa ka nisur që tani të bëjë bujë përballja futbollistike që kalon kufijtë sportivë. Tirana ia doli të kalojë në raundin tjetër në Ligën e Kampioneve atje ku e pret Crvena Zvezda, kampionia e Serbisë që do të luajë në Tiranë për herë të parë që prej 1945.

Klubi nga Beogradi me më shumë trofe në vendin ballkanas, do të shpresojë për një “replay” të para 75 vjetëve kur shkatërroi 5-2 një seleksion shqiptar. Asokohe ishte 22 Prill 1945 dhe Crvena Zvezda e kishte vizitën e parë jashtë vendit.

Në një ndeshje që do të karakterizohet edhe nga mesazhet politike dhe nacionaliste, Tirana tani do të shpresojë të bëjë surprizën në stadiumin Air Albania të martën. Edhe pse pa tifozë, bardheblutë në valët e entuziazmit mund t’i japin tifozëve shqiptarë një surprizë të bukur mbrëmjen e 25 Gushtit në orën 20:00.

Arbitri kryesor do të jetë Kasper Sjoberg, një bilbil pa shumë eksperiencë ndërkombëtare me vetëm 9 ndeshje të gjykuara dhe që ka marrë stemën e FIFA-s vetëm vitin e kaluar. Ngjall diskutime zgjedhja e UEFA-s për një sfidë që paraqet tension edhe pse gjyqtari suedez konsiderohet i ftohtë dhe pa ndikime.